جيتك مشهل بي غناي
شايل مطر أشواق خريف كل المواسم و الفصول
جيتك معاي ...
كل المواعيد و المحطات و المرافي
البينا
أوراق إعتماد
و كل التواريخ و الكتابات و القوافي
البينا
تأشيرة دخول
جيتك بدور
أترع معاك نخب التصافي
و نتكي .....
نرحل مشاوير التوتر
نستبيح سر الدواخل و الخوافي
و احكي ليك عنك
و عن روعة ملامحك
لما ترسم
لوحة أشواق المشارق و المغارب
و المنافي
من بدري راجينك توافي
ترجع الفرح المجافي
و تمسح الحزن الموالف
يا صباح ليل الهواجس و المخاوف
يا سند كف المحاسن و العوارف
3 التعليقات:
بما أنك كتبت باللهجة السودانية حسب تصوري (كونك من السودان).. فأود أن توضح لي بعض المفردات مع أني فهمتها من السياق لكن أود التأكد من صحة فهمي لها: مشهل - البينا
وسؤالي الآخر:
لماذا قدمت الخيف على كل المواسم والفصول وكأنه صار بيان لها!
إن كان من تنادي عليه بهذه المواصفات التي ذكرتها.. فمن حقه أن يشعر بالزهو
عزيزتي سراج
التحايا النواضر
كلمة مشهل تعني في لهجتنا السودانية (الإكتناز أو الإمتلاء) أما كلمة البينا فتعني (ما بيننا).
أما تقديمي للخريف علي باقي المواسم فذلك لأن الخريف عندنا في السودان هو أكثرها إخضرارا و نضرة.
من يشعر بالزهو حقيقة هو أنا لتفاعلك العميق مع ما أكتب و إن جاء بلهجتي السودانية.
دمتي بخير و عافية
أيامكم سعيدة.. وإن شاء الله من العايدن بصحة وعافية
إرسال تعليق